പുഴുക്കലരി

പോരിവെയിലത്തെ
നീണ്ട ക്യൂ അവസാനിപ്പിച്ചു
റേഷന്‍കടക്കാരന്‍
പേരു വിള്ളിച്ചു മണ്ണെണ്ണയും
പഞ്ചാരയും പുഴുക്കലരിയും
തൂക്കി തന്നു ...
വീട്ടിലെത്തി
പുഴുത്തപുഴുക്കലരി
മൂന്നായി ഭാഗം വെച്ചു
പുഴു വേറെ
കല്ല് വേറെ
അരി വേറെ
വെളുത്ത പുഴുക്കള്‍
വാഗ്‌ദാനങ്ങള്‍ തിന്ന
വയറും പേറി
പല്ലിള്ളിച്ചു കാണിച്ചു.
കറുത്ത കല്ലുകള്‍
കടിച്ചാല്‍ പൊട്ടാത്ത
വാക്കുകളെ പോലെ
തുറിച്ചു നോക്കി
അരി മാത്രം
ചത്ത കുഞ്ഞിനെ പോലെ
കണ്ണുമടച്ചു ചുരുണ്ടു
കൂടി കിടന്നു.